ژیان نامەی شاعیری گەورەی کورد شێرکۆ بێکەس

شێرکۆ،شاعیری ئازادی و بەرگری کاری ژن و ئەوینی پاک و خۆشەویستی بێخەوش، شاعیری ئەنفال و کیمیابارانی هەڵەبجە و ژنە ڕەشپۆشەکانی پاش
ئەنفال ومنداڵەهەژارەکان و بێ نەواکان، شاعیری ڕۆژانی ئاوارەیی و ژیانی کولەمەرگی سەردەمی شۆڕش و بەگژداچونەوەی دوژمنانی کورد، یەکێکە لە وەرچەرخێنەرانی شیعری کوردی و نزیکەی نیو سەدە پێش ئێستا ڕێچکەیەکی نویی ئەدەبی کوردی گرتەبەر و هەنگاوێکی گەورەی لە ئەدەبی کوردیدا بڕی.
شێرکۆ بێکەس کوڕی شاعیری ناوداری کورد فایەق بێکەسه و
ڕۆژی ٢ی ئایاری ساڵی ١٩۴٠ لە گەڕەکی گۆیژەی شاری سلێمانی لە دایکبووە، تەمەنی هەشت ساڵان بووە بێکەسی باوکی ساڵی ١٩۴٨ کۆچی دوایی کردووە. منداڵی و لاوێتی شێرکۆ بێکەس پڕ بووە لە ئازار و ژانی بێکەسی و نالەباری رەوشی ئابوری، لە نێو هەلومەرجی سەخت و بێکەسیدا قۆناغی  ئامادەیی تەواو کردووە، تەمەنی حەڤدە ساڵان بووە یەکەمین شیعری لە ڕۆژنامەی ژین و ساڵی 1968 یەکەمین کۆمەڵە شیعری بە ناوی تریفەی هەڵبەست بڵاو کردوەتەوە. لە حەفتاکانی سەدەی ڕابڕدوودا ڕەوتی ڕوانگەیان دامەزراندووە، کە بە یەکێک لە گروپە چالاکەکانی بواری ئەدەبیاتی کوردی دادەنرێت.شێرکۆ بێکەس دەیان خەڵاتی نێودەوڵەتی لە بواری شیعردا وەرگرتووە دیارترینیان، ساڵی 1987 خەڵاتی توخولسکیی لە سوێد بووە
کە یەکێکە لە خەڵاتە گەورەکانی بواری ئەدەبیات لە جیهاندا، خاوەنی دەیان دیوانی شیعری چاپکراوە ، ساڵی 2009 بەر لە مردنی تەواوی بەرهەمەکانی  لە کتێبێکی هەشت هەزار لاپەرەییدا چاپکراوە، زۆربەی شیعرەکانی بە ئینگلیزی، فەرەنسی، سوێدی، ئەڵمانی، ئیتالی، تورکی، فارسی، عەرەبی ، چاپ کراون. بە داخێکی زۆرەوە لە 4 ئابی2013 لە وڵاتی سوێد کۆچی دوایی کردو  زۆربەی نووسەران و شاعیران، کۆچەکەی بە خەسارەتێکی گەورە لە ئەدەبیاتی  کوردی و جیهانی وەسف دەکەن.
دەقی وەسیەت نامەکەی مامۆستا شێرکۆ بێکەس.
من نامەوێت لە ھیچ کام لە گرد و گردۆڵەکەکاندا بنێژرێم کە دیارن و ناویان ئەبرێ، یەکەم لەبەرئەوەی پڕبونەتەوە و دووەم لەبەرئەوەی من حەز بە قەرەباڵغی زۆر ناکەم، من ئەمەوێ ئەگەر سەرۆکی شارەوانی و ئەنجومەنی شارەوانی شارەکەم ڕێگەم پێبدا و ئەوەم پێ ڕەوا ببینن کە لە پارکی ئازادیدا و بە تەنیشت مۆنۆمێنتەکەی شەھیدانی ١٩٦٣ی سلێمانییەوە بمنێژن، ئەوێ خۆشترە و تەنگەنەفەس نابم، من حەز ئەکەم بە مردویش نزیکی ئەو خەڵکەو ژن و پیاوی شارەکەم و دەنگی جمۆسیقا و گۆرانی و ھەڵپەڕکێ و یانە جوانەکانی ئەو پارکە بم. با کتێبخانەکەم و دیوانەکانم و وێنەکانم ببرێن بۆ شوێن مەزارەکەم، با کافتریایەک و باخچەیەکی بچکۆلانە لەو شوێنەدا ھەبێت بۆئەوەی شاعیران و نوسەران و کچ و کوڕی دڵدار ببنە میوانم، من ئەمەوێ لە ئێستەوە بەچاوی خەیاڵ تەماشای ئەو پارکە بکەم و دوای مردنی خۆم ببینم، ئەمەوێ بەدەم چریکەی دیلان و ئەڵڵا وەیسییەکەی مەردان و سرودی خوایە وەتەن ئاواکەیەوە ئاڵای کوردستانم تێوە پێچرابێ و بنێژرێم، من ئەمەوێ لە پرسەکەمدا مۆسیقا لێبدرێت، لەناو مەزارەکەمدا تابلۆی جوانی ھونەرمەندانی شارەکەم ھەڵبواسن، من ئەمەوێ دوای خۆم و بەناوی «بێکەس» ەوە خەڵاتێکی ساڵانە تەرخان بکرێ و بدرێت بە جوانترین دیوانە شیعری ھەڵبژێردراوی ئەو ساڵە و خەرجی ئەم خەڵاتەیش لەو میراتە بدرێ کە جێیدەهێڵم.
ئامادەکاری دەق.مەنسورئەمین نژاد
سەرچاوەکان.wikepedia.kurdpedia.evenebook.sbeiy