مزگێنی دا بە سروە، بای بەھاری وا ھاتەوە نەورۆزی کوردەواری
بە ناوی بەرزە ناوی بێگەرد و بێ ھاوتا
مزگێنی دا بە سروە، بای بەھاری وا ھاتەوە نەورۆزی کوردەواری
بۆ جەماوەری شارە جوانەکەمان بانە، بە بۆنەی نوێڕۆژ و ھاتنی ساڵی نوێ؛
سەرەتای ساڵی ٢٧١٧ی کوردی و بووژانەوەی سروشت، کە ھێمای ژیانەوە و خۆشەویستیە، لە ھەموان پیرۆز بێت.
خۆشەویستان و ھاوشاریانی ھێژا، پێشەکی پیرۆزبایی خۆمان بە بۆنەی سەرھەڵدانی وەرزێکی نوێ، واتە نەورۆز و سەری ساڵی نوێی کوردی بە گەلی کورد بە تایبەت و سەرجەم گەلانی ھۆگری نەورۆز لە ناوخۆی ئێران و لە جیھان بەگشتی پیرۆز دەکەین.
ئازیزان و خۆشەویستان، شوناس و ناسنامەی ھەر نەتەوەیەک بریتیە لە پێشینەی فەرھەنگی. لەم نێوەدا داب و نەریتە کۆمەڵایەتیەکان ڕۆڵ و دەورێکی کارا دەبینن و نەریتی نەورۆزی پیرۆزیش وەک یەکێک لە گرنگترین و دیارترین بۆنە نەتەوایەتیەکان لەنێو بابەتە فەرھەنگیەکانی ئێمەدا وەک خۆر لە ئاسمانی مێژووی کوردەواریدا دەدرەوشێتەوە؛ ھەر بۆیەش پێویستە بۆ باشتر و شادتر بەڕێوەبردنی ئەم جەژنە پیرۆزە وەک ئەرکێکی نەتەوایەتی، گشت ھەست و ھزر و تواناکانمان تەرخان بکەین و ژن و پیاو، گەنج و بەتەمەن، خۆمان بە جل‌و‌بەرگی جوان و ڕەسەنی کوردی وەڕازێنین و لەم نەریتە پیرۆزەدا بە خاوەن دەرکەوین.
خۆشەویستان، نوێڕۆژ (نەورۆز) واتا نوێ‌بوونەوە و دەسپێکی نوێ بەرەو گۆڕانێکی پیرۆز. بە گشتی ئاگر لە باوەڕی مێژووی ئێمەدا ھێمایەکی بەرز و بەنڕخ و پارێزراوە. ئەستوونی ئەو باوەڕەش لە سەر ئەو پێگە و بنەما پتەوە دامەزراوە کە لە چوار پێکھاتەی سەرکی جیھان (خاک، ئاو، ھەوا و ئاگر)، ڕەنگە سێیان (خاک و ئاو و ھەوا ) پیس و پەڵۆخ ببن؛ بەڵام ئاگر نەک پیس نابێت، بەڵکوو پیسیەکانیش لەگەڵ خۆی دەبات. کەواتە ئاگری نەورۆز نەک بۆ پیس‌کردنی ھەوا و ئاو و خاکەکەمان نییە، بەڵکۆ ھێمای پاک کردنەوە و پاراستنی جوانیەکانی ئەو ژینگەیە کە بۆخۆمان ژیانی تێدا بەسەر ئەبەین.
با ھەموومان پێکەوە بەرەو پێری جەژنی ڕەسەن و لە مێژینەی کوردەواری بچین؛ شادی بکەین و بە تێگەیشتن لە فەلسەفەی نەورۆز جەژن بگرین. بەرەو وەرزی بەھار بچین و بیکەینە بیانویەک بۆ چاوپێکەوتن و پێکەوەبوون و گۆڤەند و شادی و دووربین لە ھەر چەشنە ڕەفتارێک کە بۆنی جەژنی پێوە نەبێت. خۆ بپارێزین لە ھەر کارێک کە برین و ئێش و ئازار بخوڵقێنێ و کارەساتی دڵتەزێنێ لێ بکەوێتەوە؛ نەورۆز بکەین بە ئاگر کردنەوە و شادی و خۆشی و ھەڵپەڕین؛ نەک بە تەقاندن و لاستیک سووتاندن مەترسی بین لەسەر ھاووڵاتیان و سروشت و ژینگەی خۆمان پیس و پڵۆخ بکەین.
کردەوەی دزێو و تۆقێنەر و کارەساتبار لە گەڵ فەلسەفەی نەورۆز و داب و نەریتە بەرزەکانی کوردەواریدا ناگۆنجێت و ئەوە دیاری ناحەزانە و دەستی چەپەڵی لە پشتە بۆ دوور خستنەوەمان لە ناسنامە و کلتوورمان.
داوا لە سەرجەم ھاوشاریان دەکەین زۆر بە وریایی و ژیرانە بەرپەرچی ئەو کارە دزێوانە بدەنەوەو نەھێڵن کردەوەی ناحەز تێکەل بە داب و نەریتی بەرز و جوان و شیرینی کوردەواری بیت.
بە ھیوای نەورۆزێکی شادیھێنەر و بەرەو ساڵێکی پڕ لە خۆشی و سەرکەوتن بۆ تاک و بنەماڵە و کۆمەڵگاکەمان و گشت مرۆڤایەتی. ٣٠ی ڕەشەمێی ١٣٩۵ی ھەتاوی (٣٠ بھمن ١٣٩۵ شمسی)
واحد واحد لباس، جشن، بازی، صنایع دستی
کمیتە میراث فرهنگی
بنکەی گەشەی فەرھەنگی بانە – ئاشتی
دیدگاهتان را بنویسید