بروسکەی پرسە و سەرەخۆشیی بنکەی ئاشتی بانە، بۆ چالاکوانانی ژینگە پارێزی کوردستان

هەواڵی دڵتەزێنی کارەساتی ڕووداوی هاتوچۆی ڕێگەی مەریوان، کە بوو بە هۆی لە دەستدانی چوار ڕۆڵەی نیشتمان لە ئەندامانی گروپی کەژەوانی “ئەنجومەنی سەوزی چیای مەریوان”،کە بەڕێوە بوون بۆ بانە، بە مەبەستی بەشداری لە چالاکی کەژەوانیی هاوبەش لە گەڵ هاوڕێیانی “ئەنجومەنی پاژین”ی بانە، هەموومانی داخدار و خەمناک کرد.

 تڕاژێدیایەک کە پەستا پەستا ڕۆڵەکانی کوردستانی کردۆتە قوربانی جادە و ڕێگە بەکەندولەندو نالەبارەکان و بەداخەوە ئەمجاریش

بوو بە هۆی گیان بەختکردنی چالاکوانان و دڵسۆزانی بە ئەمەگ و پارێزەرانی ژینگە جوانەکەی کوردستان.

بە بۆنەی ئەم خەسارە جەرگبڕ و دڵتەزێنەوە، وەک بنکە ئاشتی بانە، وێڕای دەربڕینی هاوخەمی لە دەستدانی ئازیزانمان، پرسەو سەرەخۆشی خۆمان ئاڕاستە دەکەین بە هەموو کوردستان و جەماوەری شارە جوانەکەی مەریوان و بنەماڵە و کەسوکاری ئازیزانی کۆچکردوو و ئەنجومەنە ژینگەپارێزەکانی کوردستان، بەتایبەت “ئەنجومەنی سەوزی چیای مەریوان” و “ئەنجومەنی پاژین” ی بانە.

لە خوای گەورە داواکارین سەبووری بە دڵی هەمووان و سڵامەتی و تەندروستی بە بریندارانی ئەم کارەساتە دڵهەژێنە ببەخشێت.

بنکەی گەشەی فەرهەنگی بانە(ئاشتی)

۱٤ی جۆزەردانی ۱٤۰۰ی هەتاوی