بنکەی ئاشتی, [⁨21⁩ فوریه ⁨2023⁩، در ⁨08:36⁩]
پەیامی بنکەی ئاشتی بانە، بە بۆنەی ٢ی ڕەشەمە، ڕۆژی جیهانی زمانی دایک

”زمانی دایک، تەنها زمانێکە کە مرۆڤ لە ڕێگای ئەوەوە بیر دەکاتەوەو خەون دەبینێت.”
د.کانگاس، شارەزا و تیۆریسیێن لە بواری زمانی دایکی

مرۆڤی کورد، خۆی بە منەتباری خەزێنەی بەنڕخ و پایەداری بەرهەمەکانی زانایان، هونەرمەندان، شاعیران و نووسەرانی کورد دەزانێت. سامانێک کە سەرەڕای نکۆڵی لێکردن و ڕێگریی هێژمۆنیکیی دەسەڵاتە ناوچەییەکان، بە شانازییەوە توانیویەتی زمانی کوردی بە زیندوویی بهێڵێتەوە. گەنجینەی هونەر و نووسراوەی کوردی کە بۆمان ماوەتەوە، ئەرکێکی هەستیار و قورسی خستۆتە سەر شانمان. هەرچەن ڕێگرییەکان هەن و زۆریشن، بەڵام بە خۆشحاڵییەوە وەک دەیبینین، ماوەیەکی زۆرە کە چالاکانی هونەری، مەدەنی و فەرهەنگی سەردەم، بە بێ هیچ چاوەڕوانی و بەرانبەرێک، ئەو ئەرکەیان لە ئەستۆ گرتووە و زۆر بە باشی ئەرکی فێرکاریی زمانی کوردییان، بردۆتە نێو دڵی تاک و جەرگەی گوند و شار و بنەماڵەکانی کوردستان.

فێرکاری و هۆژان بە زمانی دایکی، نەک نابێتە هۆکارێک بۆ لێکدابڕان و جیابوونەوەی نەتەوەکان، بەڵکوو بە پێی بەرەنجامی لێکۆڵینەوە زانستی و کۆمەڵایەتیەکان، سیاسەتی فێرکاریی چەند زبانی لە کاروباری پەروەردەو ڕاهێناندا، کاریگەری ئەرێنی لە سەر گەشەی فەرهەنگی وڵات دادەنێت.

ساڵەکانی سەرەتایی خوێندنی فەرمی، دەسپێکی فێربوونی بەهرە بنەڕەتییەکانی خوێندنەوەو نووسینن. ئەو بەهرانەی کە بەردی بناغەی گەشەی کەسایەتیی منداڵان دروست دەکات. ئەو منداڵانەی کە لە دواڕۆژدا، تەنها ئومێد و کۆڵەکەی خاترجەمی گەشە و پێشکەوتنیی هەمەلایەنەی کۆمەڵگان. کەواتە هەر یاسایەک کە ئەو مافە پێشێل بکات و، ڕێگر بێت لە خوێندن بە زمانی دایکی، لە ڕاستیدا بۆتە بەربەستێک لە بەرانبەر گەشەی ئینسانی، فەرهەنگی، کۆمەڵایەتی و ئابووری هەموو وڵات.

ڕاهێنان و خوێندن و نووسین بە زمانی دایک، پێویستترین، ئاساییترین و سەرەکیترین پێوەری مافە بنەڕەتییەکانی هەموو گەلانی ئێران و جیهانە.

پیرۆز بێت ڕۆژی جیهانی زمانی دایک

بنکەی گەشەی فەرهەنگی بانە(ئاشتی)
سێشەممە، ٢ی ڕەشەمەی ١٤٠١ی هەتاوی
https://t.me/ashtybane