ڕاگەیاندنی بنکەی ئاشتی بانە،

بە بۆنەی ساڵۆگەڕی کۆچی دوایی هاوڕێی خۆشەویستمان، کاک نەجمەدین قادری، ئەندامی دەستەی دامەزرێنەری بنکەی ئاشتی

ساڵی ٩٣ بوو. شارەکەمان بانە، وەک هەموو کوردستان، بەسەر خەم و ئەزمەو تەنگەژەیەکی جەرگبڕدا کەوەت. شاقەیرانی ئاوارەیی و دەربەدەریی خەڵکی شنگاڵ، بەدوای کوشتوبڕ و ژێنۆسایدیان لە لایەن ڕێکخراوەی دژی مرۆڤایەتی و تێرۆریستی داعیشەوە. نەجمە، هەر وەک زۆربەی تەمەنی ژیرانە و پڕ لە شانازی خۆی بە خەمخۆریی شار و گەلەکەی و تێکۆشان و چالاکیی فەرهەنگی و کۆمەڵایەتی تێپەڕ کردبوو، ئەمجاریش سرەوتی نەما و ئارامی لێ بڕا. ئەو لەگەڵ ٧ کەس لە هاوڕێیانی، وەک فریاڕەسی کۆمەڵایەتی۲، ڕێکەوتن لەسەر چالاکی بۆ کۆکردنەوە و گەیاندنی یارمەتی و بەهاناوەچوونی بەرکەوتووان و ئاوارەبووانی شاڵاوی ژێنۆسایدی کوردەکانی شنگاڵ. دوای سەرکەوتنێکی گەورە لەو چالاکییەدا، نەجمە و هاوڕێیانی ڕایان چووە سەر بیرۆکەی دامەزرانی ڕێکخراوەیەکی نوێی فەرهەنگی، کۆمەڵایەتییەوەو، بەو مەبەستەوە لێک نەپچڕان و درێژەیان بە چالاکییەکانیان دا. هەر لەو ساڵەدا، نەجمە و هاوڕێیانی سەرەڕای بەکردەیی کردنی بیرۆکەی سازدانی پەیکەرەی مامەڕەحەو چەندین چالاکیی گرینگی فەرهەنگیی، خۆیان وەک گروپێکی ڕێکخراوەیی نوێ بە شارەکەمان ناساند. دامەزرانی بنکەی گەشەی فەرهەنگی بانە(ئاشتی)، بەرهەمی هاودڵیی و هەوڵ و تێکۆشانی هاوبەشی فەرهەنگیی چالاکوانانی مەدەنیی شارەکەمان، کاک نەجمەو هاوڕێیانی بوو. بەداخەوە کە مەرگ فرسەتی نەجمەی نەدا کە بەرهەمی تێکۆشانی خۆی و هاوڕێیانی ببینێت. نەجمە، لە ٢٢ی گوڵانی ١٣٩٤ی هەتاویدا، لە سەفەرێک بە مەبەستیی برەوپێدان بە کەسب و کاری بازرگانی و دەستەبەرکردنی مافێک لە مافە ڕەواکانیی خەڵکی شارەکەمان، بەرێوە بوو بەرەو شاری سنە بۆ بەشداری لە کۆبوونەوەی ژووری بازرگانی کوردستان. بەداخەوە لە ڕوووداوی تاڵ و دڵتەزێنی وەرگەڕانی ئوتۆمبیلەکەیدا لە مەودای نێوان دیواندەرەو سنە، مەرگ مەودای نەدا و چووە نێو کاروانی نەمرانی شار و گەلەکەمانەوە. کۆچی دوایی لەناکاو و ناوەختی نەجمە، خەمێکیی گشتیی بوو، هەم بۆ شاری بانەو  هەم بۆ هەموو کوردستان. بەشداریی بەرین و فراوانی جەماوەریی کوردستان، لە ڕێوڕسمی بەخاک سپاردنی، نیشانێک بوو لە پەرۆشی و خەمناکیی جەماوەریی، بۆ لە دەست دانی ڕۆڵەیەکی ماندوونەناس و تێکۆشەری گەلەکەمان.

نەجمەی قادری، چالاکی مەدەنیی، فەرهەنگیی و بازرگانیی شارەکامان، کاسایەتی و ڕۆڵەیەکی تێکۆشەری ڕاستەقینەی گەلەکامان و یەکێک لە دامەزرێنەرانی بنکەی ئاشتی بانەو ئاڵا هەڵگری یەک ڕەنگیی و پاکیی بوو. سارێژکەری برینی لەدەستدانی کاک نەجمەو و کاسانی کاریگەر و چالاک، کە لە مێژووی شار و گەلەکەماندا وەک دارایی مەعنەویی و کۆمەڵایەتی چاویان لێدەکرێت، تەنها خۆڕاگریی و بەردەوامیی و درێژەدانە بە ڕێگا پیرۆزەکەیان، بۆ گەیشتن بەو خولیاو ئامانجانەی کە هەمان هیوا و ئاواتە هاوبەشەکانی گەلەکەمانن.

ئێمە وەک بنکەی ئاشتی بانە، لە ساڵۆگەڕی کۆچکی دوایی هەڤاڵی تێکۆشەرمان، نەجمەدین قادری، هەوڵ و تێکۆشانەکانی بەڕێزیان، بەرز دەنڕخێنین و جارێکیدی هاوخەمیی خۆمان بۆ بنەماڵەو خەڵکی شارەکەمان و گشت جەماوەری کوردستان دەردەبڕین و بەڵین تازە دەکەینەوە کە ڕێبوار و درێژەدەری ڕێگەی پیرۆزیان بین. بنکەی ئاشتی، هیوای بەختەوەریی و ئاسوودەیی و ژیانێکی سەرکەوتوو و پڕ لە سەروەری بۆ بنەماڵەی بەڕێزی کاک نەجمە دەخوازێت.

بنکەی گەشەی فەرهەنگی بانە(ئاشتی)، ٢٢ی گوڵانی ١٣٩٩ی هەتاوی

https://t.me/ashtybane